აუქციონში მონაწილე პირებისათვის საგარანტიო თანხების დაბრუნება/ჩამოჭრის შესახებ ინფორმაციის მისაღებად, გთხოვთ, მიმართოთ განმკარგველ ორგანიზაციას

ბე-ს თანხა უკან დაბრუნებას არ ექვემდებარება, თუ:

ა) პრეტენდენტი არ მიიღებს მონაწილეობას ვაჭრობაში და ამ მიზეზით არ განხორციელდა სარგებლობის ლიცენზიის რეალიზაცია.

ბ) გამარჯვებული დადგენილ ვადაში არ გადაიხდის შესაბამის თანხას.

აუქციონზე დაფიქსირებული საბოლოო თანხის 20%-ის გადახდა აუქციონში გამარჯვებულმა უნდა განახორციელოს აუქციონის დასრულებიდან არაუგვიანეს 15 კალენდარული დღის ვადაში, რომლის გადახდიდან 7 დღის ვადაში გაიცემა ლიცენზია. დარჩენილი თანხის გადახდა მან უნდა განახორციელოს 2026 წლიდან ყოველწლიურად ბოლქვების მოპოვების დაწყებამდე, მაგრამ არაუგვიანეს 31 მარტისა, აუქციონზე დაფიქსირებული საბოლოო თანხის 20%-ის ოდენობით. თუ აუქციონში გამარჯვებული დაარღვევს თანხის გადახდის წესს, იგი ვალდებულია დარღვევის დღიდან ყოველ გადაცილებულ სამუშაო დღეზე გადაიხადოს პირგასამტეხლო იმ პერიოდისათვის გადასახდელი (ვადაგადაცილებული) თანხის 1%-ის ოდენობით, ძირითადი თანხის გადახდის გადაცილებულ დღეთა რაოდენობა არ შეიძლება აღემატებოდეს 15 სამუშაო დღეს, ამავე ვადაში დაფარული უნდა იქნეს პირგასამტეხლოც, რომელთა გადახდის ვადის გადაცილების შემთხვევაში ლიცენზიის გამცემი იღებს გადაწყვეტილებას გამარჯვებულის გამოვლენის შედეგების/ლიცენზიის ძალადაკარგულად გამოცხადების თაობაზე.

ლიცენზიის მფლობელი პირი ვალდებულია:

ა) ყოველწლიურად, თეთრყვავილას ბოლქვების მოპოვების დაწყებამდე არაუგვიანეს 31 მარტისა, შეატყობინოს საქართველოს გარემოს დაცვისა და სოფლის მეურნეობის სამინისტროსა და სამინისტროს სახელმწიფო საქვეუწყებო დაწესებულებას - გარემოსდაცვითი ზედამხედველობის დეპარტამენტს:

ა.ა) თეთრყვავილას მოპოვების უბნების სიტუაციური გეგმები, shp ფაილები, UTM –X,Y კოორდინატთა სისტემაში ზუსტი გრაფიკი მოპოვების უბნების მიხედვით, ინფორმაცია აღნიშნულ ტერიტორიებზე არსებული თეთრყვავილას ბოლქვების ოდენობის შესახებ და ამ ტერიტორიებიდან თეთრყვავილას მოსაპოვებელი ოდენობის შესახებ;

ა.ბ.) ინფორმაცია მოსაპოვებელი ბოლქვების ზომის შესახებ და რესურსის მოპოვების გრაფიკი კონკრეტული უბნების მიხედვით. მოპოვების გრაფიკში ცვლილებების განხორციელების შემთხვევაში, მოპოვების დაწყებამდე ინფორმაცია უნდა მიეწოდოს სამინისტროს და სსდ გარემოსდაცვითი ზედამხედველობის დეპარტამენტს.

ბ) 2027 წლიდან ყოველწლიურად, თეთრყვავილას ბოლქვების მოპოვების დაწყებამდე მინიმუმ ერთი თვით ადრე საქართველოს გარემოს დაცვისა და სოფლის მეურნეობის სამინისტროში წარმოადგინოს თითოეული ბოლქვების მოპოვების სამიზნე ტერიტორიისათვის რესურსის მოთხოვნილი მოცულობის ამოღების არასაზიანო მოპოვების კვლევის ანგარიში (ანგარიშის შექმნის მეთოდოლოგიური საფუძველი და ფორმატი ლიცენზიანტებისათვის მიწოდებული იქნება საქართველოს გარემოს დაცვისა და სოფლის მეურნეობის სამინისტროს მიერ) და მასზე დაფუძნებული შესაბამისი ექსპერტის/სპეციალისტის დადებითი დასკვნა, გარდა იმ უბნებისა (იხ. დანართი), რომელთათვის კვლევა განხორციელდა საქართველოს გარემოს დაცვისა და სოფლის მეურნეობის სამინისტროს დაკვეთით და გაანგარიშდა თითოეული ასეთი უბნისათვის რესურსის ამოღების წლიური ლიმიტი.

გ) სახელმწიფო ტყის ტერიტორიაზე თეთრყვავილას ბოლქვების მოპოვების შემთხვევაში კონკრეტული ტერიტორიები უნდა შეუთანხმდეს შესაბამის მართვის ორგანოს.

დ) არაუგვიანეს 2026 წლის 01 მაისისა, ფლობდეს ბოლქვების რეალიზაციისათვის მოსამზადებლად საჭირო ინფრასტრუქტურას: სათვლელ და კალიბრაციის დანადგარებს, ბოლქვების შესანახად ვარგის სათავსოს, რომელშიც შესაძლებელი იქნება საჭირო ტემპერატურისა და ტენიანობის შენარჩუნება.

ე) საქართველოს გარემოს დაცვისა და სოფლის მეურნეობის სამინისტროში და სამინისტროს სახელმწიფო საქვეუწყებო დაწესებულებაში - გარემოსდაცვითი ზედამხედველობის დეპარტამენტში ყოველწლიურად 30 დეკემბრამდე წარმოადგინოს შესაბამისი ანგარიში ფოტოდოკუმენტაციით:

ე.ა.) თუ ლიცენზიის მფლობელი პირი ახორციელებს თეთრყვავილას ბოლქვების ამოღებას 1-დან 10-ის ჩათვლით უბანზე, მინიმუმ 1 შემთხვევით შერჩეულ უბანზე ანგარიშში თარიღის, უბნის და ამოღების ადგილის მინიმუმ ერთი x y კოორდინატები UTM კოორდინატთა სისტემაში მითითებით, უბანზე წარმოდგენილი ძირითადი ჰაბიტატი, ბოლქვების ამოღების ტერიტორიის ფართობი, ბოლქვების ამოღებისას გამოყენებული მეთოდი, ამოღებული ბოლქვების და უბანზე მომუშავე პერსონალის რაოდენობა.

ე.ბ.) თუ ლიცენზიანტის მიერ ბოლქვების მოპოვება დაგეგმილია 11-დან 20-ის ჩათვლით უბანზე, მაშინ იგი ვალდებულია წარადგინოს მინიმუმ 2 შემთხვევითად შერჩეულ უბანზე ამოღების პროცესის დამადასტურებული ანგარიში;

ე.გ.) თუ ბოლქვების ამოღება იგეგმება 21 და მეტ უბანზე, მაშინ ასეთი ანგარიშების რაოდენობა წარმოდგენილი უნდა იყოს მინიმუმ 4 შემთხვევითად შერჩეული უბნებისათვის.

ე.დ.) თეთრყვავილას ბუნებრივი პოპულაციებიდან მოპოვებული არასასაქონლო ბოლქვებისა და მოპოვების უბნებში მათი დაბრუნების პროცენტული რაოდენობისა და უბნების შესახებ, ფოტოდოკუმენტაციით;

ე.ე.) ექსპორტის შემდეგ ინფორმაცია მოპოვების მეთოდის, ბოლქვების შენახვის, დახარისხების, გაშრობის, ტრანსპორტირების, დასაქმებული პირების ოდენობისა და ადგილობრივი მოსახლეობის ჩართულობის, მოპოვების ტერიტორიების, მოპოვების თარიღის/პერიოდის შესახებ, ასევე, სასაქონლო და არასასაქონლო ზომის ბოლქვების ფაქტობრივად მოპოვებული ოდენობების შესახებ. ანგარიშს უნდა დაერთოს შესაბამისი ფოტომასალა (მათ შორის მოპოვების ამსახველი).

ვ) არასასაქონლო ზომის ბოლქვების მოპოვების შემთხვევაში, ბოლქვების კერძო საკუთრებაში არსებულ ნაკვეთებზე ჩათესვის საკითხი შეთანხმებული უნდა იქნას სამინისტროსთან.

ზ) ლიცენზიის მფლობელი ვალდებულია „ლიცენზიებისა და ნებართვების შესახებ“ საქართველოს კანონით დადგენილი წესით სამინისტროსა და სამინისტროს სახელმწიფო საქვეუწყებო დაწესებულება - გარემოსდაცვითი ზედამხედველობის დეპარტამენტში წარადგინოს სალიცენზიო პირობების დაცვის შესახებ წლიური ანგარიში.

თ) დაიცვას თეთრყვავილას მოპოვების დასაშვები მოცულობა (კვოტა). ამასთან, კვოტის აუთვისებლობის შემთხვევაში, არ დაიშვება მომდევნო წლისათვის აუთვისებელი კვოტის დამატება.