1. აუქციონში გამარჯვებული ვალდებულია:

ა) ლაგოდეხის აღკვეთილის ტერიტორიაზე არსებულ 6 000 კვ.მ (თანდართული სიტუაციური გეგმის შესაბამისად) არასასოფლო-სამეურნეო დანიშნულების მიწის ნაკვეთზე, შესაბამისი ხელშეკრულების ხელმოწერიდან 2 (ორი) წლის ვადაში უზრუნველყოს სასტუმროს და კაფეტერიის აშენება/მოწყობა, საქართველოს მთავრობის 2015 წლის 14 ივლისის N349 დადგენილებით დამტკიცებული „ლაგოდეხის დაცული ტერიტორიების მენეჯმენტის გეგმის“ მე-40 მუხლის მე-3 პუნქტის „ე.ბ“ ქვეპუნქტებით და 41-ე მუხლის მე-2 პუნქტის „ე.ბ“-„ე.გ“ ქვეპუნქტებით განსაზღვრული პარამეტრების (კაფეტერია - სიმაღლე - არანაკლებ 4მ-ისა, სიგანე - არანაკლებ 10 მ-ისა და სიგრძე - არანაკლებ 20 მ-ისა და სასტუმრო -სიმაღლე- არანაკლებ 4 მ-ისა, სიგანე - არანაკლებ 10 მისა და სიგრძე - არანაკლებ 20 მ-ისა) შესაბამისად;

ბ) „ა“ პუნქტით გათვალისწინებული ტურისტული ინფრასტრუქტურის აშენება/მოწყობის მიზნით უზრუნველყოს არანაკლებ 1 000 000 (ერთი მილიონი) ლარის ოდენობის ინვესტიციის განხორციელება;

გ) „ბ“ პუნქტით გათვალისწინებული საინვესტიციო ვალდებულებების შესრულების უზრუნველსაყოფად, აღნაგობის ხელშეკრულების გაფორმებიდან 2 (ორი) თვის ვადაში უზრუნველყოს უპირობო და გამოუხმობი საბანკო გარანტიის წარმოდგენა, მთლიანი საინვესტიციო თანხის 10%-ის ოდენობით, რომლის მოქმედების ვადაც არანაკლებ 4 (ოთხი) თვით უნდა აღემატებოდეს საინვესტიციო ვალდებულებების შესრულების ვადას;

დ) „ა“ პუნქტით გათვალისწინებული ობიექტების (კაფეტერია, სასტუმრო) არქიტექტურული პროექტი (რენდერი), წინასწარ, შესაბამის მშენებლობის ნებართვის გამცემ უფლებამოსილ უწყებაში წარდგენამდე შეათანხმოს სსიპ „დაცული ტერიტორიების სააგენტოსთან“.

ე) სამშენებლო სამუშაოების განსახორციელებელი საპროექტო-სახარჯთაღრიცხვო დოკუმენტაციის მომზადების შემდგომ უზრუნველყოს ზურმუხტის ქსელზე შეფასების დოკუმენტის მომზადება.

ვ) ხელშეკრულების მოქმედების მთელი პერიოდის განმავლობაში დააზღვიოს აღნაგობის საგანზე აღმართული ქონება.

2. აღნაგობის ვადის დასრულების და/ან ვადამდე შეწყვეტის შემთხვევაში გადაცემულ მიწის ნაკვეთზე აღნაგობის უფლების მქონე პირის მიერ მოწყობილი/აშენებული მთელი ინფრასტრუქტურა, აღნაგობის უფლების მქონე პირისათვის ყოველგვარი ანაზღაურებისა და კომპენსაციის გადახდის გარეშე რჩება სახელმწიფო საკუთრებაში.

3.ინვესტიციის მოცულობა დადასტურებული უნდა იქნას სსიპ „ლევან სამხარაულის სახელობის სასამართლო ექსპერტიზის ეროვნული ბიუროს“ ან/და შესაბამისი აკრედიტაციის/ლიცენზიის მქონე პირის/ორგანოს მიერ გაცემული საექსპერტო დასკვნის საფუძველზე.

4. სასყიდლიანი აღნაგობის უფლებით გადაცემის ვადად განისაზღვრება 35 (ოცდათხუთმეტი) წელი.

5. სასყიდლიანი აღნაგობის უფლებით გადაცემის საწყისი სააუქციონო ფასი განისაზღვრება 10 000 (ათი ათასი) ლარის ოდენობით (დღგ-ს ჩათვლით) წელიწადში. ამასთან, სსიპ „დაცული ტერიტორიების სააგენტო“ უფლებამოსილია ყოველ 10 (ათი) წელიწადში ერთხელ მოითხოვოს აღნაგობის საზღაურის გადახედვა საქართველოს კანონმდებლობით განსაზღვრული ორგანოს მიერ დადგენილი ეროვნული სამომხმარებლო ფასების ინდექსის მიხედვით და გაზარდოს აღნაგობის საფასური, რისთვისაც ბაზისად აღებული იქნება აღნაგობის ხელშეკრულების გაფორმების თარიღის მაჩვენებელი.

6. აუქციონში მონაწილეობისათვის უპირობო და გამოუხმობი საბანკო გარანტიის/ბეს ოდენობა განისაზღვრება 3 000 (სამი ათასი) ლარით (საწყისი საფასურის 30%) (“ბე“ უკან დაბრუნებას არ ექვემდებარება, თუ მონაწილე არ მიიღებს მონაწილეობას ვაჭრობაში).

7. აუქციონის ბიჯის სიდიდე განისაზღვრება 1000 (ერთი ათასი) ლარით.

აუქციონში მონაწილე პირებისათვის საგარანტიო თანხების დაბრუნება/ჩამოჭრის შესახებ ინფორმაციის მისაღებად, გთხოვთ, მიმართოთ განმკარგველ ორგანიზაციას.