სააუქციონო პირობები

მყიდველი ვალდებულია: 1. შპს ,,საფეხბურთო კლუბი ტორპედო ქუთაისის“ (საიდენტიფიკაციო კოდის №212917183) 100%-იანი წილის გადაცემიდან არაუგვიანეს 2021 წლის 30 სექტემბრამდე არსებული კრედიტორული დავალიანების დასაფარად, განახორციელოს 670 000.00 (ექვსასსამოცდაათიათასი) - ლარის ინვესტიცია, ხოლო არაუგვიანეს 2021 წლის 31 დეკემბრამდე განახორციელოს არანაკლებ 1 800 000.00 (ერთი მილიონ რვაასი ათასი) ლარის ინვესტიცია.

2. მართოს შეზღუდული პასუხისმგებლობის საზოგადოება „საფეხბურთო კლუბი ტორპედო ქუთაისი“ (საიდენტიფიკაციო კოდის №212917183) როგორც გულისხმიერმა მფლობელმა, კეთილსინდისიერი კომერსანტის ძალისხმევით, მოიძიოს ინვესტორები, დონორები და საქართველოს კანონმდებლობით გათვალისწინებული შემოსავლის სხვა წყაროები, რათა კლუბის წლიურმა ბიუჯეტმა შეადგინოს მინიმუმ 4 000 000.00 (ოთხი მილიონი) ლარი.

3. უეფასა და ეროვნული ლიცენზიის ყოველწლიურად ასაღებად, კომპანიაში შექმნას საჭირო პირობები, ლიცენზირების დებულებების შესაბამისად. უზრუნველყოს, კომპანიის საფეხბურთო გუნდების შესაბამის ლიგებში ასპარეზობა. საკუთრებაში გადაცემული კომპანიის გამართულად ფუნქციონირებისათვის, ყოველწლიურად უზრუნველყოს  საჭირო პირობების შექმნა.

4. უზრუნველყოს საფეხბურთო სკოლა-აკადემიისა და ბავშვთა გუნდების ფუნქციონირება (წელიწადში 100-200 ბავშვზე), ოფიციალური მატჩებისა და სასწავლო-საწვრთნელი პროცესი, ფიფას, უეფას და საქართველოს ფეხბურთის ეროვნული ფედერაციის დებულებით დადგენილი პირობების შესაბამისად.

5. უზრუნველყოს, რომ საფეხბურთო კლუბმა შეასრულოს უეფასა და საქართველოს ფეხბურთის ეროვნული ფედერაციის მიერ დადგენილი საკლუბო ლიცენზირების სავალდებულო მოთხოვნები და სხვა სტანდარტები.

6. დაიცვას ადგილობრივ და უეფას საკლუბო შეჯიბრებებში მონაწილეობისათვის კლუბების ლიცენზირების დებულებებით დადგენილი „სამი წლის“ წესი. (უეფას საკლუბო შეჯიბრებებში მონაწილეობისათვის კლუბების ლიცენზირების დებულების მე-11 მუხლის შესაბამისად).

7. შეზღუდული პასუხისმგებლობის საზოგადოება „საფეხბურთო კლუბი ტორპედო ქუთაისის“ (საიდენტიფიკაციო კოდის №212917183) 100%-იანი წილის ნასყიდობის ხელშეკრულების გაფორმებამდე, ქალაქ ქუთაისის მუნიციპალიტეტის მერიაში წარმოადგინოს „ვებგვერდისა და რეესტრის ელექტრონული ფორმით წარმოების, მისი სტრუქტურის, ფორმის, მასში ასახული ინფორმაციის ნუსხისა და მომხმარებელთა იდენტიფიცირების წესის განსაზღვრის თაობაზე“ ბუღალტრული აღრიცხვის, ანგარიშგებისა და აუდიტის ზედამხედველობის სამსახურის უფროსის 2016 წლის 28 ოქტომბრის №17 ბრძანების მე-2 მუხლით განსაზღვრული აუდიტორების/აუდიტორული ფირმების სახელმწიფო რეესტრში www.saras.gov.ge-ზე რეგისტრირებული პირველი, ან მეორე კატეგორიის აუდიტორული კომპანიის დადასტურება, ინვესტორი იურიდიული პირის ფინანსური შემოსავლების გამჭვირვალეობის შესახებ.

8. უზრუნველყოს ქუთაისის საქალაქო სასამართლოს წარმოებაში არსებული (მოსარჩელე: შეზღუდული პასუხისმგებლობის საზოგადოება „ქოფიმა“ (საიდენტიფიკაციო კოდის №405033743), მოპასუხე: შეზღუდული პასუხისმგებლობის საზოგადოება „საფეხბურთო კლუბი ტორპედო ქუთაისი“ (საიდენტიფიკაციო კოდის №212917183), საქმე №2/1978-21) საქართველოს საერთო სასამართლოების მიერ მიღებული გადაწყვეტილებ(ებ)იდან გამომდინარე/წარმოშობილი შეზღუდული პასუხისმგებლობის საზოგადოება „საფეხბურთო კლუბი ტორპედო ქუთაისისა“ და ქალაქ ქუთაისის მუნიციპალიტეტის მიმართ არსებული ყოველგვარი მოთხოვნის, ასევე, შეზღუდული პასუხისმგებლობის საზოგადოება „საფეხბურთო კლუბი ტორპედო ქუთაისისა“ და ქალაქ ქუთაისის მუნიციპალიტეტის მიმართ წარმოშობილი ყოველგვარი (მათ შორის, სამომავლო) პრეტენზიის/მოთხოვნის (მათ შორის, საქართველოს საერთო სასამართლოების მიერ დადგენილი) დაკმაყოფილება  არაუმეტეს 3 000 000 (სამი მილიონი) ლარის ფარგლებში, საკუთარი სახსრებით, შეზღუდული პასუხისმგებლობის საზოგადოება „საფეხბურთო კლუბი ტორპედო ქუთაისისა“ და ქალაქ ქუთაისის მუნიციპალიტეტის სასარგებლოდ.

9. თუ იარსებებს შეზღუდული პასუხისმგებლობის საზოგადოება „საფეხბურთო კლუბი ტორპედო ქუთაისის“ ფინანსური მდგრადობის, მათ შორის სახელფასო დავალიანების წარმოქმნის რისკი, ინვესტორი ვალდებულია ქალაქ ქუთაისის მუნიციპალიტეტის მერიის მოთხოვნის შემთხვევაში, 7 სამუშაო დღის ვადაში, წარმოადგინოს 4 000 000 (ოთხი მილიონი) ლარის საბანკო გარანტია შესაბამისი ვალდებულებების შესრულების უზრუნველსაყოფად (ამასთან, მიკროსაფინანსო ან/და სადაზღვევო ორგანიზაციიდან გაცემული საბანკო გარანტია არ დაიშვება).

10. არ შეცვალოს შპს ,,საფეხბურთო კლუბ ტორპედო ქუთაისის“ (საიდენტიფიკაციო კოდის №212917183)  სპორტული პროფილი „ფეხბურთი“ და სახელწოდება.

11. მოზიდული ინვესტიციის 10% გამოიყენოს მატერიალურ-ტექნიკური ბაზის განვითარებისათვის, თუ აღნიშნული არ შეეწინააღმდეგება საქართველოში მოქმედ კანონმდებლობას.

12. მყიდველი ვალდებულია აანაზღაუროს შპს ,,საფეხბურთო კლუბი ტორპედო ქუთაისის“ (საიდენტიფიკაციო კოდის №212917183) ყოველგვარი დავალიანება კრედიტორების წინაშე.

13. ზემოაღნიშნული პირობებიდან ერთ-ერთის შეუსრულებლობის შემთხვევაში შპს ,,საფეხბურთო კლუბი ტორპედო ქუთაისის“ (საიდენტიფიკაციო კოდის №212917183) 100%-იანი წილი საკუთრებაში უბრუნდება ქალაქ ქუთაისის მუნიციპალიტეტს. ამასთან,  მყიდველი ვალდებულია გაუმჯობესებული ქონება ყოველგვარი დავალიანების გარეშე დააბრუნოს დაუყონებლივ შესაბამისი სარეგისტრაციო და სხვა საჭირო პროცედურების გავლის უზრუნველყოფის ჩათვლით, რის შემდგომაც გამყიდველი იმსჯელებს ხელშეკრულების შეწყვეტაზე.

ქალაქ ქუთაისის მუნიციპალიტეტი თავის მხრივ იღებს ვალდებულებას, ხელი შეუწყოს მყიდველს, ნაკისრი ვალდებულებების შესრულებაში, რისთვისაც, კანონით დადგენილი წესით, სარგებლობაში გადასცემს საფეხბურთო ბაზას.